هنا الزاهد: "لم أتخيل أن أحمل لقب مطلقة"

كشفت الممثلة هنا الزاهد مع الإعلامية إسعاد يونس عن تأثرها بتجربة الزواج والانفصال من الممثل أحمد فهمي.

 

وتحدثت الزاهد عن تجربة الزواج والانفصال من أحمد فهمي، قائلة: "كانت تجربة صعبة بس اتعلمت منها كتير، أنا مبعرفش أطبخ بس بعرف أدير البيت وبعرف أكون زوجة شاطرة".

 

وأضافت هنا: "عن تجربة الجواز لو يرجع بيا الزمن كنت هدخل الموضوع تاني علشان أتعلم، وأنا كنت راسمة حياة وردية، بس في النهاية كل شيء قسمة ونصيب، واكتشفت أن الجواز باكدج مش راجل وست لا الجواز عائلة، لازم تختاري العائلة".

 

وأكملت: "وأنا بحترم أهل جوزي جداً، بس مبحبش التدخلات، وقالت لإسعاد يونس إنتي أول حد اكتشف، كان في عزاء والد دينا الشربيني ومكنش حد يعرف أي شيء، وساعتها إنتي اللي قولتلي إنتي مالك أنت عينك مطفية".

 

وعن تأثير الانفصال على حياة هنا الزاهد قالت: "أنا شخصية لا تعرف معنى كلمة طلاق، ولم أتخيل يوما أن أحمل لقب مطلقة، والموضوع بعد الانفصال كان مؤلم لكن من رحمة ربنا أنه حدث تدريجيا على مدار 8 شهور، أنا قولت بعد ما هيحصل دا أنا هتأثر جداً، بس أنا منزلتش دمعة، قولت الموضوع خلص خلاص وكان لازم أعالج نفسي، وأهم حاجة إني كنت وسط عائلتي، وأنك تبقى مؤمنة أن ربنا بيعمل دايما الخير، وأن دي فترة في حياتي وخلاص انتهت".

 

وتابعت: "كنت ساعتها بصور فيلم "فاصل من اللحظات اللذيذة" وكان آخر يومين لما الناس اكتشفت، وكل الناس وقتها اتصدمت وقالولي محسناش للحظة أنك فيه حاجة أصلا".

 

وأضافت: "اللي اتغير فيا أنا كنت ماشية بقلبي أوي وكنت عنيدة أمام أي نصيحة، بس بقيت أفكر بعقلي، وبقيت أفترض أن اللي قدامي مش طيب زي مانا كنت فاكرة".

 

واختتمت: "أنا بكن له كل الخير، وممكن نشتغل مع بعض بس لو دور حلو، بس هو أصبح بالنسبالي زميل بس مش صديق".